Ricetta dei Risi e gò de Nani

Pubblichiamo una ricetta scritta in dialetto veneziano da uno dei "fondatori" delle Antiche Carampane Giovanni Bortoluzzi Librai detto "Nani".

Per quatro persone basta un chilo de go (quei picoli che se ghe da ai gati),na segola,na carota e na gamba de sedano. Curar i go e metarli su una pignata coversendoli de acqua abondante, metarghe sedano, carota e segola, do scugiarini de ogio e sal. Far bogiar e tegnirlo in calda.

Su una tecia metar do o tre scuglieri e ogio e un spigolo de agio e far sofrisar. Co l'agio sarà beo rosolà cavarlo e mertar na cicara da cafè de risi par persona più una par la tecia e darghe na bea remenada e tirar a cotura i risi co el brodo dei go come se el brodo fusse de carne.

Poco prima de cavarlo dal fogo metarghe na nosa de butiro, na branca de parzemolo e do scugeri de formagio (che no sia tanto picante) e darghe na bea sbatua, metarghe el covercio e lassar a riposar per qualche minuto e servir.

El risotto ga da essere all'onda.